幾時地下有錢都唔執？咪係見到係毫子囉，咩呀，毫子唔係錢呀？係，但係個個都唔要佢，而家連街市阿姐都嫌棄佢呀！不過，就算係一張廁紙、一條底褲都有佢本身嘅用處㗎嘛，毛毛儲錢買樓都靠你㗎喇！

嘩！因乜事搞到成地毫子？一陣咪有排執？咪住先，好似又有啲特別喎……唔通想鋪晒出嚟搵返啲皇冠頭出嚟賣？

原來有一個波蘭嘅阿太想裝修吓個地板，又唔嫌錢腥，咁咪拎啲毫子鋪滿個地板囉，仲擺咗教學上去imgur同reddit同大家開心share?。

材料好簡單，當然有毫子啦，但係最重要嘅係要有齊新舊毫子，咁先有唔同嘅colorrr去砌啲唔同嘅pattern㗎嘛，仲有大家嘅美勞堂集體回憶，大量嘅白膠漿。砌好圖案之後將佢哋一個一個痴好再加返層樹脂就大功告成喇！

佢話過程都唔係咁順利㗎，因為有班汪星人喺度「狗狗震」！特別係左手邊呢隻呀，不過又難怪嘅，你好改唔改改人哋個名叫Trouble，唔畀麻煩你都對唔住自己啦汪～佢最鍾意吼人哋唔為意就踩散晒啲銀，再唔係就係上面便便，所以好唔容易先整得晒成個地板㗎。

唉～不過一睇就知佢大整蠱，你以為強逼症嘅人會就咁滿足咩？實在太天真喇！入面隱隱約約有幾個銀仔係歪嘅，又有啲個圖案唔同咗，最慘係咩呀？佢用樹脂封死晒，你想郁佢都無得郁呀！毛毛就覺得應該放一個金幣喺入面，等啲人搵到又拎唔到，一於等佢哋葉劉吓～

圖片來源：TonyaTooners/imgur