唔知而家嘅小朋友仲識唔識摺紙飛機呀、紙船咁㗎呢？不過就算識，都應該唔會自己研究落去囉，有時間都要去學西班牙文同非洲鼓啦，摺紙呢啲邊有用㗎（喺怪獸家長眼中）……日本人似乎就比我哋更加願意花時間鑽研一啲其他人眼中，係廢青先做嘅嘢喇。

就好似日本呢個網民咁呀，用成足足兩個月時間研究點樣用一張紙摺隻哥斯拉出嚟！

一開頭，佢連張紙嘅黑色同紅色都係自己油㗎，製作相當認真！

佢唔係一開波就直接嚟嘅，而係用其他細張少少嘅紙試摺下，慢慢研究下哥斯拉背鰭嘅基本構造先嘅。睇住佢愈試愈似哥斯拉，真係好勵志呀！

過咗兩個月，佢終於成功神還原哥斯拉喇！仲要係一紙到尾，完全係摺出嚟，冇剪貼過㗎～見到個頭同背鰭整得咁仔細，真係除咗擘大個口得個窿之外，都畀唔到其他反應喇！

呢個摺紙達人一啲都唔自私，post埋佢辛苦研究得出嘅成果上網，不過可能佢知大家就算睇到都唔識跟住摺，所以先唔介意post出嚟啩……

之前都有個日本神人用炸雞骨砌咗王者基多拉出嚟，唔知摺紙哥斯拉同雞骨基多拉對戰，邊個會散開先呢？！

折紙でシンゴジラ。ようやく完成。不切正方形１枚折り。#折り紙作品 #シンゴジラ pic.twitter.com/oqUkCxUJ4n

— ゼニガメ男爵 (@ori2ga3mi) November 13, 2016

封面圖片、資料來源連結：ori2ga3mi／twitter、honeoyaji／twitter

延伸閱讀：【點做到】日本強人用炸雞骨神還原王者基多拉