大人嘅世界真係好煩，咩咁煩？淨係每朝要打理嗰堆煩惱絲就夠煩啦。呢個精叻BB就提早進入呢個複雜世界，一出世就頭毛特別茂盛，咁多煩惱絲，唔知佢煩緊咩呢？一定係食奶奶先定係瞓覺覺豬先喇！

你睇吓佢，出世21日啲頭髮就已經生到密密麻麻，好似P圖P上去咁呀～最初BB嘅爹哋媽咪都無為意，但係到佢啲頭髪「快高長大」就發覺有啲弊啦。

原來係佢啲頭髮一直向上發展，幾個月就生到六吋長，咁長都仲係屹立不倒，搞到呀媽抱住佢落樓梯都睇唔到路呀！不過唔緊要啦，行唔到樓梯咪搭電梯囉，辦法總比困難多呀嘛～

呀B唔止頭髮特長，仲要表情多多，你睇佢眼大大嗰個打耳樣真係令人心都甜埋呀～所以喺街度都有好多人搵佢影相㗎，人仔細細就咁受歡迎，搞到毛毛都好葡萄呀⋯⋯

而家佢21個月大，啲頭髮已經多到好似戴咗假髮咁，仲可以紥到個完美嘅噴泉頭?！你睇吓個噴泉高到，唔係個個都紥到㗎，你估政府啲音樂噴泉咁，話起就起咩～不過睇到佢呢個頭，毛毛就諗起第二啲嘢。

係魔髮精靈呀～唔通阿B都係精靈，所以佢啲頭髮先咁長？話唔定佢仲好似精靈咁有唱歌天份?～到時叫佢唱返首《頭髮亂了》就perfect池喇～分分鐘可以做沐浴巨星個friend，洗頭巨星呀！

封面圖片及資料來源：每日郵報

圖片來源：電影《魔髮精靈》官方網頁