青雲哥教落，做人無公關就食sss㗎，其實又點止呀，打工仔月尾跑唔到數咪又係要食sss? 不過強國嘅腦細，皇恩浩蕩，唔使你食sss，請你食苦瓜又點話呀。唔知係咪怕你唔夠營養呢，所以最近又有新搞作喇！

強國有間傢俬鋪，為咗叫員工好好記住跑唔到數嘅後果，於是罰唔夠數嘅人食蟲喇。你可能會話：蟲啫，上面大把燒蠍子燒蜘蛛啦。畀你估到就唔係強國腦細啦，人哋係要你生吞，仲要係寵物店買返嚟嘅生猛麥皮蟲呀！嘩，玩咁大，唔通蛋白質有助醒腦提神嘅？

唔好話腦細唔益你哋呀，見你哋齋食咁寡，連酒都同你準備埋，仲唔下跪多謝腦細？你睇吓你班廢青，嗰幾條蟲仔就咁驚青，啲老友記打仗都係食呢啲㗎咋。

代表公司嘅自宮發言人就話啲同事係「自願」受罰㗎喎，朝早佢哋「自己」定咗個目標，夜晚達唔到就受罰，少一個客就吞四條蟲，之前吞生墨魚同螞蟻都試過喇，仲話呢種係另類鼓勵咁話喎。

做打工仔嘅，腦細話咩就咩囉，學品客叔叔話齋，You always agree with your boss，right? 腦細話你自願，唔通你話唔係咩？可以點？無㗎，好似呢位兄台咁，流淚呀繼續做囉。

圖片來源：人民網
延伸閱讀：【強國最苦】Meet唔到target？罰你生食苦瓜！