唔好以為個個女仔嘅浪漫都係「刺身加嚿飯」呀，其實而家興「食壽司食剩飯」就真！好多人去食放題都會偷偷地食剩嚿飯，等個肚多啲位裝其他嘢食，感覺上就冇咁蝕底喇。不過原來逐碟計錢嘅平價迴轉壽司店，都一樣有呢個情況出現㗎。

之前都同大家講過，有唔少日本妹豬為咗keep fit而食壽司嘅時候淨係食上面塊魚生，食剩一嚿二嚿飯仲要post上網曬命，話畀人知自己幾忍得口。咁大嘥，毛毛都以為夠晒過份啦，點知再過份啲都仲得呀！

係人都知食迴轉壽司係一場信任遊戲，埋單嘅時候店員數到你枱面有幾多隻碟就照住收錢。點知有台灣網民話去食迴轉壽司嘅時候，見到有人竟然食剩嚿飯之餘，仲要將隻碟歸位，擺返上條轉轉軌道度呀！唉，為咗幾蚊，輸咗人格，食咗都背脊骨落啦，值得咩？

要對付呢啲大嘥鬼，罰佢錢都唔夠呀，罰佢食晒呢個白飯定食就啱㗎喇，等佢食真啲白飯係咩味，一邊食一邊諗下農夫種米粒粒皆辛苦嘅大道理！

封面圖片、資料來源連結： 靠北奧客

延伸閱讀：【大嘥鬼】日本女仔為減肥 食壽司食剩飯