講起星戰，大家都一定會諗起遮打，唔係花園呀，係Jedi，即係絕地武士呀！個個著晒袍，又有碌好勁嘅嘢喺度發吓發吓，毛毛講緊碌光劍 （Light Saber) 呀，你諗咗去邊呀？不過現實要做絕地武士又真係好難嘅，你估個個都係古仔咩。

英國就有個男人，佢無古仔咁有型，但係做Jedi嘅決心就肯肯定勁過古仔，佢為咗成為一個堅・絕地武士，連有廚師都唔做，加入絕地教，每日著住套袍同帶住支光劍四圍走，做咗全英國第一個全職絕地武士。但你問佢係咪星戰迷呢？佢又唔係，只係好Buy 絕地教嘅教義所以先加入咋。

個個見佢咁著，都忍唔住對住佢大嗌「I am your father!」，嘩咁多人佢爭住認係個阿爸，呢鋪仲唔可以「成功靠父幹」？不過都唔係大家諗得咁爽皮㗎，佢為咗做Jedi，搞到拍咗拖六年嘅女朋友都頂佢唔順要走呀，咁又係嘅，你家吓咁「出眾」，唔通佢扮莉亞公主陪你咩。

著到咁樣行出街，有啲小朋友會搵佢影相，又有啲C9會讚佢自己整套衫手工好。但都有好多人覺得佢咁大個人仲玩cosplay，會話佢係怪叔叔，甚至當住細路面爆粗鬧佢?。

你點都估唔到最支持佢做絕地武士嘅，竟然係政府呀！佢而家無收入，都係靠政府津貼，仲要連當局都提議佢註冊激光劍做宗教物品，咁佢咪可以帶住碌嘢去邊都得囉。所以話，就算追夢，都要睇地方嘅，你試吓喺香港做Jedi，唔止話你係廢青、廢中，連地鐵都唔使旨意搭呀你！

不過，如果你用普通話講我好鍾意睇Star War乜乜乜，再加多句我爸是Death Vadar，可能會唔止會放你搭地鐵，話唔定叫的士送埋你去迪迪尼?～

封面圖片及資料來源：Caters News