有一種浪漫叫阿爺將啲玩具留畀老竇，然後老竇再留畀你玩。雖然唔係好貴，但係哎吔都叫做「傳家之寶」呀嘛。老老77，話唔定入面會有啲咩絕版三七二十一萬能俠，到時你就發喇！

呢位英國嘅仁兄就好啦，好似小丸子咁，細細個就有個好鍚佢嘅爺爺，好鍾意同佢玩海盜遊戲，仲畀咗成袋由世界各地儲返嚟嘅銀仔佢。呢袋銀仔就成為佢嘅寶物喇～不過有睇反斗奇兵嘅都知，人大咗啲玩具就會放埋一邊，所以呢袋銀仔就畀佢打咗入冷宮喇。

直到爺爺過咗身，佢先拎返啲銀仔出嚟。諗返細個玩嘅快樂日子，經過那些年～囝囝都同佢當年差唔多大，所以佢就決定將呢個海盜寶藏傳畀囝囝喇！見個仔玩得咁開心，佢仲好有心機咁買咗個寶箱畀佢載住啲寶物?。

唔係呀嘛，佢自己玩咗咁耐，再加埋個仔玩咁耐都唔覺有唔妥？就係！佢一直以為啲銀仔全部都係朱義盛，唔逐個入箱都睇唔出有兩個寧舍不同嘅金幣呀～好彩佢終於發現到，仲拎去畀專家睇，一睇之下，先知係絕晒版嘅古董金幣，有300年歷史，值成二十七萬英磅呀！爺爺點解咁犀利連咁稀有嘅金幣都搵到呢？莫非⋯⋯

爺爺就係海賊王羅傑？又或者係海盜王Johnny Deeper都未定喎！Any肥，無論留低嘅係啲咩，只要係摯愛嘅親人留低畀你嘅，就已經係最大嘅寶物啦，right? 無咩事，毛毛想返去摷床下底啲雜物箱先⋯⋯

封面圖片及資料來源：每日郵報