​玩具，係小朋友嘅第一個好朋友。但對於佢嚟講，玩具係佢一生好友，佢叫Ricky Sir，一個香港塑膠玩具收藏家。

「Made in Hong Kong」情意結

60年代出世嘅Ricky Sir，專門收藏60－70年代香港製造嘅塑膠玩具。一儲就廿幾年，一儲就成千件。

細個買唔起靚玩具，而大多數Made in HK嘅高質玩具多數都出口去全世界。

「而家可以搵返以前屬於香港嘅嘢，都算係填補返細個嘅回憶。」

90年代，香港工業式微，再加上97回歸，香港大部分玩具工廠北移，由「Made in Hong Kong」變成「Made in China」。

「收集玩具，就可以保留返香港昔日嘅蹤影。」

香港地產業急速發展，新樓起得快，但舊舖舊屋邨拆得更快。

一棟棟大樓可以突然消失，更何況係小小嘅塑膠玩具？

回憶最深嘅機械人

「細個好恨要機械人㗎！爸爸以前買過一個畀我。」

一個機械人，等於擁有全世界。愈難得到嘅嘢，愈會去珍惜。

「而家淨係搵到近似嘅款式，都仲未搵得返嗰一款。」

雖然同兒時玩伴無緣再會，但Ricky Sir表示唔會將收集返嚟嘅玩具改裝成心目中嘅模樣，原汁原味先係保存玩具嘅精神。

有啲嘢，改咗就同晒。

公諸同好，係開心嘅！

Ricky Sir喺今年兩度舉辦「香港塑膠玩具展覽」，仲話估唔到有咁多後生仔嚟睇。

「平時儲埋咁多玩具都係收收埋埋，所以有得搞個展覽，其實真係幾開心㗎！」

「佢哋冇機會接觸到呢啲玩具，而家可以畀佢哋睇下摸下，等多啲人知道真正屬於香港嘅嘢。睇完之後佢哋都話會對香港多咗份情。」

原來，一個小小嘅玩具展，已經能夠宣揚香港嘅精神。

結集成書，分發回憶

「暫時唔會再開展覽住喇，想整好本書先。」

下一步，Ricky Sir打算將收集返嚟嘅玩具結集成書，咁樣就可以將玩具永久保存。

處理好本書之後，Ricky Sir可能會忍痛將啲玩具分發出去。

「我想將呢份回憶分散出去，等其他人都可以開展佢哋嘅收藏之路，人人都可以保存香港嘅回憶。」

屬於我哋每個人、屬於香港嘅本土回憶。一件小小嘅玩具，對Ricky Sir嚟講，係好大嘅意義。

#毛記專訪 #本土玩具