而家啲啤啤越賣越貴，特別係寫到明handmade嗰啲，隻隻都賣幾嚿水，但係女神鍾意嘅話，唔好話幾嚿呀，幾千銀都要買啦～所以如果識整公仔又整得靚，真係好著數㗎。但係毛毛整極都係唔似貓唔似狗⋯⋯

澳洲嘅Campbell仔就唔同呢，由9歲開始學整公仔，到而家每日整一隻都仲得呀！咁犀利，咁佢咪即時登上人生勝利組？廿歲買樓不是夢喇！但係Campbell仔一分錢都冇收，整嘅公仔都送晒去醫院，送畀患病嘅小朋友，點止kind of sweet 咁簡單，簡直甜到漏呀！

照計一個9歲小朋友應該鍾意打機、踢波同玩吓車仔㗎，點解佢唔揸模型車走去揸衣車呢？一開始Campbell仔係想叫爹哋媽咪買禮物畀醫院嘅小朋友嘅，但係咁多人，哪有錢⋯⋯咁就唯有DIY，Do It Yourself啦～阿媽諗住佢都係畫吓公仔㗎啫，點知佢話要學用衣車整公仔喎。

呢三年Campbell仔大大話話都整咗成800隻公仔，送咗畀全球各地嘅患病兒童，睇清楚，唔係80隻，係800隻咁多呀！睇相真係睇唔出係一個12歲嘅細路整出嚟。唉，想當年毛毛12歲，最叻嗰次都係將隔籬同學仔條褲嗰兩個窿聯埋咋。Campbell仔仲得到好多獎項表揚佢呢份善心同埋努力～所以話，做傑青，唔使有樓嘅～

​

睇到Campbell仔整啲公仔咁靚，係咪都即刻心郁郁，想整返隻氹吓女女呢～諗吓好喇，你都冇女。

封面圖片及資料來源：Oddity Central

延伸閱讀：父母唔肯買AppleWatch 9歲細路搞滴蠟生意自己買