狗狗可以做到人類最好嘅朋友，除咗因為忠誠之外，仲因為佢哋對主人嘅信任！主人畀指令要做咩，佢哋都會照做㗎，主人畀咩佢哋食，佢哋都完全唔會懷疑，對主人係100％信任！不過最近，喺一隻狗狗身上，就發生咗令佢同主人之間嘅信任完全崩壞嘅悲劇……

話說個主人畀咗碗水狗狗飲，但佢竟然開心到揈晒尾喎！清水梗係冇咁大吸引力啦，原來主人用咗有骨骨圖案嘅碗仔裝水畀佢飲，搞到佢一望落去以為有嚿大骨骨呀！

「咦喂？食極都食唔到嘅？等本汪睇清楚啲先……明明係睇到㗎喎，乜咁奇怪嘅……」相信佢呢一刻嘅心情，一定好似托住老花眼鏡睇報紙嘅老竇咁，開始懷疑自己嘅視力……

「唔會㗎！主人話畀骨骨我，佢唔會整蠱我咁衰㗎汪汪！」狗狗出手掘呀掘，始終都空手而回。

狗狗終於明白到，吃不到的骨骨是酸的。佢真係覺得好酸，好酸，酸到想唱返句「我的信心崩潰了！終於我哭了～不必坐通宵～」……喺呢個時候，佢對掛住拍片嘅主人絕望喇，佢唔想再相信主人。望住眼前呢兜水，佢分唔到係清水，定係眼淚…… 

封面圖片、資料來源連結：SilkeCaproens

延伸閱讀：【媽咪崩潰一刻】阿B倒到成個廁所都係狗糧 狗狗竟然仲走埋去食