2016年11月19日 星期六
【視覺系料理】日本網民挑戰整螢光綠飯糰
嗱，便利店嘅飯糰大家就見得多嘞，唔知視覺系嘅飯糰大家又見過未呢？話說，最近有一位日本網民就挑戰整螢光綠飯糰，話呢嚿飯糰喺漆黑之中都可以好似螢火蟲一樣咁出眾喎！而家就等毛毛同大家一齊睇下個螢光綠飯糰係點整先～
首先，話明整螢光綠飯糰，就梗係要準備米、水、綠色食用色素，同埋……B2維他命丸？冇錯，B2維他命丸成功整出螢光綠飯糰嘅關鍵！
準備好材料之後，就可以將所有材料放晒入個煲度，跟住煲到啲米變成一粒粒又香又軟嘅飯就可以熄爐嘞。
ok，最後將啲飯搓成飯糰咁樣樣，再加塊紫菜，咁個螢光綠飯糰就大功告成㗎喇！
可能好多人都覺得呢嚿螢光綠飯糰好核突，見到都唔開胃，但以毛毛9估，其實人哋可能係想借呢個螢光綠飯糰嚟話畀大家知「唔係樣樣嘢熄咗燈都一樣」呢個大道理啫！再講吖，整定呢啲飯糰擺屋企，咁下次停電嗰陣，咪可以快啲搵到嘢食醫肚囉……應該係，除非唔係。
資料來源：unatra／twitter
