一個人咩時候變臉變得最快？咪係講到錢嗰陣囉，明明上一個moment仲有講有笑，一講到錢字立即變黑亦得，得咗！所以話，錢真係好重要架，「有錢」點止可以做傑青，連偉人都有得你做呀！

呢位師兄就係喺架車度思考人生嗰陣，領悟到呢個真理，佢竟然發現只要有五蚊美金，就可以變林肯喇！佢一拼落去，何止面型，連髮線同鬍鬚都perfect match! 莫非佢好似tbb劇集咁，終於發現自己係失憶嘅不死人林肯？

果然係偉大嘅領袖，一post上reddit，就引起成班網民跟風學佢咁影相喇。真係唔講都唔知原來有咁多偉人流落民間啵，好似呢位財務部長咁呀，見總統返嚟，即刻跟機，你睇吓佢嗰輪廓同髮線，連眉毛都似到十足十呀！

古乳有暈「your face, your fate」，個樣生得似偉人係唔同啲嘅～如果你以為個樣唔似就玩唔到嘅話，就太睇少網民嘅創作力量同幻想喇。出嚟啦，性轉英女皇！睇唔出事頭婆變咗男人，會有啲似馮允謙喎！

已經冇人可以阻止到佢哋喇⋯⋯你睇吓連石內卜都冇得倖免呀！嗚⋯⋯石內卜嗰把油亮濃密嘅黑髮畀你哋搞到髪線向後移，你叫佢以後點樣面對莉莉？ 知唔知男人最痛係咩呀？係地中海呀，哈利～

封面圖片及資料來源：Reddit