古乳有暈：「做人老竇甚艱難」，特別係你生嘅係女嘅時候，梗係啦，囡囡係老竇上世嘅情人呀嘛～呢位型仔老竇睇嚟上世有太多情人，冇計喇，出得嚟行，預咗要還，所以而家要湊4個囡囡還債喇！ 老婆唔救佢，佢唯有po相上挨豬分享吓啲湊女血淚史，提各位巴打唔好識咁多女朋友喇～

你睇佢個樣笑得幾……開心？邊個叫你唔做好計劃呀～兩個就夠晒數呀嘛，搞到而家失晒預算喇。媽咪就唔同喇，有成班乖女陪自己傾扮靚靚心得，笑到見牙唔見眼呀～

就連佢個9歲嘅大女都忍唔住恥笑佢呀～作為一個生女嘅老竇，最怕應該唔係第日畀女婿搶走個女，而係性教育呢樣嘢。話說大女開始上性教育堂要訪問屋企人，一嚟就問佢有冇用domdom，做老竇梗係打死都話有啦，精靈嘅阿女即刻問：「咁你仲生咗咁多個？」阿女，你咁狠狠地突破，你老竇條⋯⋯盲腸，好痛㗎～

老竇都唔抵幫㗎喇～老婆想證明你好腰好腎好男人啫，叫你執個 ”Baby Bag”，你竟然直接塞兩個女落去個名貴真皮袋，仲話要?幾個窿入佢哋啲腳仔？連女人嘅命根都夠膽話開窿，因住聽朝瞓醒個身多幾個窿呀人哋老公～

好彩呢對Twins囡囡都唔弱，夠膽塞我哋落袋？受死啦你～！

其實呢，女人真係好難服侍㗎～做阿爸嘅又要做人肉馬騮架，有時又要做咕喱同人肉提款機～不過佢4個囡囡咁打耳，就算係幾難服侍，對於型爸都係一個甜蜜嘅負荷啦～

封面圖片及資料來源：Boredpanda