「或者唔係『爬坡』需要我哋，而係我哋需要佢。」

 

兩年前，新婚夫婦David同Yo嘅朋友喺青衣公園，發現被遺棄嘅小唐狗「爬坡」。本來佢哋只係答應朋友嘅請求，收留「爬坡」幾日，但相處幾日後，發現「爬坡」真係好有靈性。

 

最後，David同Yo決定領養「爬坡」，佢從此成為彼此重要嘅伙伴。

 

 

【山中成長】

 

帶狗狗散步嘅方法有好多種。

 

有人鍾意帶狗狗游水，有人鍾意同狗狗跑步，甚至有人同狗狗一齊踩滑板。

 

既然已決意同「爬坡」相處一世，點解唔試吓同佢分享興趣？

 

 

不嬲都熱愛行山嘅David同Yo，喺行山同「爬坡」之間，無做到取捨，抱住「試試吓」嘅心態，帶住「爬坡」上山去。

 

「咁樣就可以魚與熊掌『一齊』兼得喇，哈哈哈⋯」

 

平時，去一去街都驚都震晒嘅「爬坡」，行山彷彿帶畀佢使命感，每一步都行得更加有自信，甚至威到行幾步就?吓包尾嘅Yo咩情況。

 

「一上到山，『爬坡』好似返去屬於佢嘅地方。」

 

「爬坡」，狗如其名，爬起山坡，行都行得囂張啲。

 

 

同狗狗生活，除咗提供基本住宿同食物，David同Yo仲想為「爬坡」及自己定下目標，大家一步一步完成，再一齊分享成功嘅喜悅。

 

所以，就有「香港300山」呢個計劃。
登上香港300座山，帶「爬坡」睇盡香港嘅風景。

 

 

 

【去日本放狗？】

 

如果狗狗嘅生命有限，點解唔帶佢睇無盡嘅風景？

 

 

收養「爬坡」無耐，David同Yo去咗十幾日蜜月旅行，委託家人幫手照顧。

 

點知玩完返屋企，發現「爬坡」因為心情低落而毛囊發炎。原來對「爬坡」嚟講，佢哋係生活嘅全部，十幾日無見佢哋，係會唔開心到病。

 

本來David同Yo有諗過不如唔好再去長途旅行，但咁樣係遷就，要做到將「爬坡」融入自己生活，就係帶埋佢去旅行。

 

 

「帶『爬坡』去日本，比起我哋自己去，真係貴好多⋯不過，寧願自己去少啲旅行，都想帶佢睇吓唔同嘅風景。」

 

除咗花費大咗，花嘅時間亦更多。

 

佢哋足足用咗365日去計劃呢10日嘅行程。

 

唔單止要幫「爬坡」申請動物簽證，仲要睇吓有咩登山路線係適合狗狗，當地Pet-friendly嘅住宿設施⋯

 

第一次喺外地行山難免都會淆淆地，但「爬坡」好快就適應，除咗做先頭部隊帶路，仲間唔中回頭點人數。

 

出發之前，David同Yo印咗「爬坡」喺香港行山嘅寫真相，諗住同日本嘅愛狗人士「膠流膠流」。意想唔到，當地人對「爬坡」行山嘅經歷好有興趣，原來香港嘅狗狗係咁嘅樣。

 

 

「有多嘢都可以代表到香港，點解唐狗唔得？」

 

 

經過今次日本之旅，除咗「爬坡」玩得盡興，亦都令David同Yo反思，唐狗係好值得有更多人關注。成日畀人標籤係可憐，但其實唐狗係好正㗎，或者大家都需要唐狗呢！

 

 

 

【繼續學習】

 

截至今日，「爬坡」已經走遍香港140座山，《香港300山》嘅目標已經差唔多完成一半。

 

以前「爬坡」嘅世界只得David 同Yo，而家佢已經見識咗好多。

 

而David同Yo亦都由飼主新手，變成半專家。「爬坡」甚至為Yo帶嚟衝勁，學多啲關於點動物心靈溝通，除咗幫到「爬坡」，亦都想幫到其他狗狗。

 

 

山峰上，彼此種下默契，彼此成長，大家互相學習。

想睇爬坡更多靚相，可以去FB Page：todayz photography 同埋IG：paboinmt57 喎！