2016年11月22日 星期二
【成個心都融晒】新西蘭特登整條地下隧道畀企鵝仔過馬路
香港有名你叫「石屎森林」，喺市區連雀仔都唔多隻呀，除咗屋企嘅喵星人汪星人，香港人有幾可見到動物？所以真係好難想像隨時會見到一堆企鵝排晒隊過馬路嘅外國係咩環境。
新西蘭嘅小藍企鵝（blue penguin）好似我哋呢班每日搭幾條線先返到公司嘅打工仔咁，日日都要來回海邊同巢穴，通街走糴直頭係壞腸胃呀，我哋就要迫地鐵同喺金鐘站賽跑呀，佢哋就要經過繁忙嘅馬路，幾危險呀，有時又會畀遊客用閃光燈影佢哋相，閃到對眼睇唔到路。
所以市政府就同埋旅遊局、土木工程公司一齊夾手夾腳起咗條地下隧道畀企鵝仔，仲有唔少公司有錢出錢，有力出力，希望佢哋可以出入平安?！
「喂你去邊呀！等埋我呀！」
條隧道裝咗鏡頭方便科學家睇下班企鵝仔用成點，又喺盡頭裝咗盞燈嚟帶路，你睇下佢哋一邊扭屁股一邊行，就知佢哋好滿意啦！
日本有烏龜通道、美國有鴨仔通道、新西蘭有企鵝通道，香港呢？唔主動去獵殺野豬都偷笑啦……
封面圖片、資料來源連結：CNN、Oamaru Blue Penguin Colony、香港野豬關注組
延伸閱讀：
