養寵物，係一生一世嘅承諾，不過唔係每個主人都會守呢個諾言，唔少寵物就係畀呢啲唔守諾言嘅主人遺棄，成為咗無家可歸嘅浪浪。呢個年頭，人類搵食都咁艱難，更何況流落街頭嘅浪浪呢？好彩，呢個世界仲有好多善心人愛護佢哋嘅。

好似台灣一位82歲伯伯咁，雖然年紀大，但依然親力親為照顧流浪貓。唔止同佢一齊照顧浪浪嗰兩姊妹鍾意佢，連平日傲嬌嘅貓主子都好黐佢㗎，只要伯伯一出聲，啲貓貓就會自動走咁埋佢度～

突然之間，呢位咁愛貓嘅伯伯有成一個月無出現過，同佢一齊餵浪浪嗰兩娣妹都覺得好奇怪，直至有日佢哋遇到伯伯個仔先知道，原來伯伯已經過咗身……而伯伯個仔就係嚟將伯伯留低嘅一封利是交畀呢對姊妹，等佢兩個好好照顧浪浪。雖然入面得6000蚊台幣唔係好多，但呢份都係伯伯嘅心意。

喺佢重病嘅時刻，佢最擔心嘅都唔係自己，而係貓貓會無人照顧。

知道伯伯離世嘅消息係好難過，但呢對姊妹唔會令伯伯失望，一定會完成伯伯嘅遺志，好好照顧流浪毛孩。毛毛相信伯伯在天之靈都會好欣慰。伯伯，多謝你，貓貓一定唔會忘記曾經有人咁愛錫佢哋，佢哋一定會感受到你呢份心意㗎！

封面圖片及資料來源：爆廢公社