喺你最窮困嘅時候，每一次跌電話都好似玩過山車咁刺激，將部機擰返轉嗰刻就好似開大細咁，究竟有壞定無壞呢？不過最灰機嘅，係有時連個天都叫你死咗條心呀（例如跌咗電話落廁所）！

不過咁，跌落廁所都仲有得拎返上嚟，而呢個阿叔就陰功豬呢，佢走去釣魚嗰陣，部iPhone4跌咗落個冰湖底喎！老老77，唔通真係會有神仙升上嚟問你跌個部係金iPhone定銀iPhone咩，所以阿叔都打定輸數，出個post講聲「完了吧，如無意外」就算。

原來希望真係在明年，一年後有個engine佬見個湖啲水退晒就拎部金屬探測器去尋寶啦，點知佢竟然喺六吋淤泥下面搵到阿叔部iPhone4呀！

最Amazing嘅係，將呢部iPhone 4清潔完放入米缸一排之後，部機真係仲著得返喎，呢啲簡直就係出於污泥而不「柒」！而好好人嘅engine佬仲特登搵返阿叔還返部機畀佢。咁最後阿叔又點安置呢部無見一年嘅舊相好呢？答案就係……送畀阿媽！嗯，真係孝義永在心呀下。

封面圖片及資料來源：每日郵報