對漫畫迷嚟講，最驚就係要子子孫孫燒畀自己先睇到結局，好彩而家《火影》完咗，《死神》都完埋，大家先稍為鬆一口氣！雖然好多人成日口裡話套嘢拖戲要脫坑，但身體咪又係好誠實咁睇到尾，然後鬧佢爛尾！老老77，睇開hunter嘅都知，其實埋到尾真係唔係必然……

《死神》連載咗16年終於完結。最近，作者久保帶人喺twitter出咗篇漫畫，話原來十週年嗰陣，佢曾經因為自己身體唔好幾乎想棄坑。佢覺得自己係一個好廢嘅漫畫家，唔似得人哋咁可以喺截稿前就畫到高汁漫畫，所以佢每日為諗辦法埋尾都搞到無晒熱誠。

就喺呢個咁絕望嘅時候，作者收到一封信。呢封信無回郵地址、無署名，佢都覺得好奇怪，但睇完入面內容之後，畀咗佢好大鼓勵。

寫信嘅男仔話畀作者聽，佢本來過緊好開心嘅校園生活，但因為突然患上重病，所以只係得返一年半命，而長期住院嘅佢一度有安樂死嘅念頭。直至佢睇咗幾集《死神》，一睇就迷上咗，而等《死神》出下一集就係佢生存嘅動力。

佢求作者無論如何都要繼續畫《死神》，畫到去作者自己想要嘅結局為止，因為咁樣先係呢個男仔最愛嘅漫畫。去到信尾，作者發現到男仔喺信尾交低咗死後要點將呢封信寄出去……即係話，作者收到呢封信嘅時候，呢個男仔已經離開人世。

而喺今年8月，作者達成咗呢個諾言，佢按住一開始畫嗰陣嘅計劃完結咗《死神》呢套漫畫。所以佢喺自己呢篇tweet，向廣大嘅網民跪求同呢個男仔有關嘅消息。因為無咗佢，《死神》可能就會埋唔到尾，令好多漫畫迷，甚至令久保老師自己都會好失望。雖然呢個男仔已經逝世，但久保老師都想同佢講一聲 －「多謝」 。

封面圖片及消息來源：tite_official /twitter