2016年11月25日 星期五
【青春少女風變簡約日系風】見到呢幾張相就好有衝動執房喇！
相信每個同阿哥家姐細佬妹同一間房嘅人，或者就算自己一間房但都七國咁亂嘅人，心目中都有間Dream Room。不過話明係Dream，又點會咁易達成呀，放假執乾淨咗張枱面都已經好高成就㗎喇。
但係睇到呢幾張相，心入面嗰把執房嘅火又重燃起嚟喇！呢間房油晒姣婆粉紅色，仲貼滿晒明星相，一睇就知係青春期嘅產物啦。個地下仲咁多雜物，得閒執執佢啦，唔係阿媽實話你「女仔之家」間房咁亂咁嫁人呀！（明明執房就冇分男女㗎囉媽咪……）
大個女喇，自自然然會想間房個style自然返啲啦，燈燈燈凳！青春少女風竟然變咗簡約日系風呀！白色牆、白色傢俬擺設、木地板，簡簡單單真係又舒服又襟睇。Less is more嘅道理，點解係都要咁大個人先領悟到㗎！
偶像嘅嘢，唔係話變就變嘅，不過大大張嘅明星Poster變晒黑白Postcard，成間房真係有style好多。將姣婆粉紅油做白色，相信呢個妹豬一定渡過咗個開心嘅油牆假期喇。
仲有呢間房都係呀，一睇就知8年前15歲嘅姑娘，8年後終於23歲喇，世事真係奇妙……
呢個twitter除咗成日都會分享執房前執房後嘅對比相，仲會post改造傢俬嘅相～呢啲膠公仔好多人都儲埋一堆，但掉又唔係，唔掉又唔係咁。
將佢哋黐喺個燈座度，再油晒金色，金像獎style嘅枱燈就完成喇！睇完咁多作品，係咪好有衝動執返好個狗竇呢！不過冇咁大間房都唔在講啦，毛毛睇死你拎晒啲雜物出嚟咪又左睇右睇，懷緬完一輪過去就收返起佢，乜事都冇發生過。
封面圖片、資料來源連結：DIYBeds／twitter
延伸閱讀：
— Before & After (@DIYBeds) November 10, 2016
