成日都聽到啲人話做魚好過做人喎，咁又係，日日唔使返工，就係個缸到游嚟游去等食，仲有專人服侍你幫你換水喎。不過，如果一條魚唔識游水，咁同一條浸喺水度嘅咸魚有咩分別！好似呢條23歲嘅老魚Sally咁，就已經老到游唔郁喇。

正確啲嚟講，Sally係浮唔起，只可以名副其實成條死魚咁，喺個水底郁吓郁吓。作為一條沉底嘅魚，唔好話游嚟游去，游上水搵食都難呀！唔通呢位老友記真係要喺水底等死？

好彩Sally有個好主人，幫佢設計咗件「魚堅尼」呀～其實只係用咗一條比堅尼帶同埋一個木塞，將佢哋綁好之後，用自己嘅方式將件衫著喺Sally度，理論上就可以幫Sally 平衡同浮起，咁佢就游得返水喇。其實主人都失敗咗好幾次㗎，不過學麥兜話dry，失敗乃成功嘅母親，努力係成功嘅父親呀嘛～

喺主人嘅努力下，手術好成功，病人唔單只冇瓜到仲可以游得返水?～上上下下、左左右右都難佢唔到呀！換轉好多人，見到條魚咁，都可能放棄咗佢喇，但其實你肯花少少心思嘅話，就可能救得返一條生命㗎喇！不過好似毛毛呢種養咩都死嘅人，睇嚟都係去養返鯉魚王罷喇。

封面圖片及資料來源：Aidan Cramer /Youtube
延伸閱讀：【係愛呀】金魚哽石仔 主人使500蚊美金都要救返佢