細個睇《忍者亂太郎》，最鍾意就係跟住首主題曲唱「索晒一巴星落yuki~」同匿埋喺張被入面扮識隱身術。雖然次次用完隱身術都係會畀阿媽搵到，但毛毛想做忍者呢團火係唔會熄㗎！等毛毛跟呢位仁兄偷下師，學下點樣維護正義，儆惡懲奸先！

呢個忍者大師叫Ryan Higa，今次嘅任務就係要喺聖誕前夕送毛氊、食物同厚衫等等嘅日常用品畀啲露宿者。之但係，佢一個人又點派畀得晒畀咁多人呢？睇住嚟啦～影分身！

而話明忍者，就梗係要神不知鬼不覺咁將啲禮物送出去，咁先顯得佢夠神秘㗎啦！

你睇下佢幾咁純熟嘅偽裝術，拎住盆草都仲有大大對腳喺下面，分明就係扮緊行路草，混入呢個充滿小精靈嘅世界啦～你見大叔幾冷靜咁接過袋嘢就知忍者哥偽裝得幾自然啦！

咁都未算，隱身術呢啲咁高階嘅忍法都絕對難佢唔到，你睇佢畀個紙箱遮住晒，完全睇唔到個身呀！你話睇到個箱？梗係啦，隱身術呀嘛，都唔係隱箱術～不過，再高明嘅忍者，都會有樣衰嘅時候。睇L住呀！係咪呢，叫咗你做忍者唔可以驕傲㗎啦～而家＿街嘞。

呢班忍者搞咁多嘢去送禮物，都係想大家都關注吓呢啲弱勢社群啫。其實喺香港都有好多露宿者需要溫暖㗎，天氣涼咗咁多，與其自己匿埋過lonely christmas，不妨約埋其他單身狗一齊做吓英雄，話唔定女女見到都會覺得你kind of sweet，主動嚟認識你呢～

封面來源及資料來源：nigahiga/ youtube