香港嘅土地問題嚴重，連豪宅都仲要分生蠔定蠔仔，住喺得嗰百幾呎嘅「蠔仔」裡面，真係想喊，係「幸福」到喊呀！好心你哋啲廢青，有間似樣嘅屋你住你就應該「感恩」啦！你睇下人哋就算露宿都幾積極？

呢位衣著咁有taste嘅「骰仔叔」（Mr. Dice)，14歲就試過露宿。佢中間撈過好多瓣，但係因為LA生活水平太高，近呢半年都係要搬過去LA呢條隧道度住。不過佢一啲都唔覺得自己可憐，仲啓動遇強越強嘅模式，話要證明畀其他人睇露宿者笨一定個個瞓紙皮，都可以有個五星級的家咁話喎！

你睇吓佢間「屋」，間隔分明，有晒浴缸、雪櫃、 仲有張四柱大床同梳化，仲要加埋潮爆嘅百變星君斑馬紋，真係Quality of Life㗎！佢仲有「客房」可以租畀人?呀。不過骰仔叔唔係啲刻薄包租公嚟㗎～主人房有咩，客房一律有咩，仲有埋個鞋櫃畀女士擺佢哋啲靚鞋，小食枱嘅嘢任食，都係收你25蚊美金一個星期，簡直係至抵精明眼之選呀！

可能你會問，唔會畀人鬧阻街咩？阻就唔太阻，骰仔叔點都留返條路畀人行嘅，但係警察叔叔就未必放佢一條生路喇，試過拆咗佢啲嘢兩次，不過砍掉咪重練囉。最近骰仔叔仲開咗條新財路，執到架熱狗車，撈埋賣Hotdog呀。雖然唔係個個敢買，但係佢喺體育館出面賣都只係賣兩個半美金一隻喎，就梗係有捧場客啦！

其實骰仔叔搞咁多嘢，只係想有一個地方，返到去令佢有家嘅感覺。古乳有暈，有頭髮有邊個想食咖喱呀，有得揀，佢又點會唔想有間屋呀。話就話有警察提議畀間臨時屋佢住，但心水清嘅網民都知，信你一成，乜都冇淨呀！好彩，骰仔叔係喺LA ，畀著喺香港就唔止間中拆下你啲嘢，係日日同你洗屋㗎喇！

封面圖片及資料來源：洛杉磯時報、Cynthia Mumba Farr/Facebook