其實講急口令好簡單，一個字，快！好似呢句，馴碌碌碌馴貨馴俗⋯⋯聽唔明？慢啲就你嘞，馴，鹿，高，速，送，貨，「馴」，熟，呀。速遞同急口令一樣，唔使急，最緊要就係快。咁講法，馴鹿簡直就係年度最佳速遞員啦！一年得一兩日時間，但係要跟住聖誕老人跑勻全球送貨喎。唔知係咪日本人睇到佢咁有potential，所以想搵佢幫手送Pizza 呀！

你無睇錯呀，佢哋最初係想用堅・馴鹿喺冰天雪地下送Pizza，貪啲鹿經驗豐富，名符其實落雨不怕，落雪更不怕呀嘛。

不過實測嗰陣就出咗少少意外咁囉⋯⋯就係馴鹿會突然之間暴走呀！梗係啦，人哋頭搖又尾擺，飄移境界㗎嘛，唔係點可以兩日環遊世界呀？你哋啲平凡人，又冇大肚腩又冇留鬚連紅色衫都冇著，點捉得佢住呢～唔係拎住條繩，你哋連鹿尾都睇唔到?呀，你哋都係放棄罷喇。

唔使怕，辦法總比困難多，少少苦楚等於激勵呀嘛～好快佢哋就有個goodest idea喇，就係將架速遞車改造成馴鹿咁嘅樣呀！真係由頭到腳再上返隻角都學足馴鹿㗎～

你睇下架車嗰對眼，真係「好似好似星星發光」呀～聖誕節見到佢經過，真係寧舍有氣氛～不過想見到佢嘅話同見鬼一樣，都係要講緣份，因為只係限定製造咗幾部，所以如果你喺日本見到佢，就記得快快手拎電話出嚟影低喇！ 

冇錢去日本？唔緊要啦，話唔定你今日返屋企都有一隻鹿喺走廊度等緊你呢～

封面圖片及資料來源：Domino Pizza日本官方網頁、Domino Pizza 官方頻道Youtube