道歉係一門好高深嘅藝術，特別係如果對方係你嘅女朋友或者腦細就更加難喇！無論係唔係你錯，你都要用自己嘅方式向佢哋say sorry，仲要畀佢哋感受你嗰份真心同誠意，你估咁易㗎？好似日本人就唔同呢，有啲咩做錯就拎把刀出嚟剖腹，肯肯定誠意十足啦！

不過命就得一條，盲腸突破極都係得一條，邊剖得咁多次腹呀～一於買呢件衫頂住先啦！你以為呢件衫只係幫你瞬間變大隻仔，等你露出胸部道歉？少年人，你太年輕喇！你見唔見個條隱隱約約嘅……唔係腹肌呀，係紅線呀？

剖腹？唔使用劍嘅，用條紅線咪得囉！佢唔係用嚟幫你求姻緣㗎，係畀你對準個位，手起但唔使刀落，拉開條拉鏈，件衫就會代你見紅㗎喇！成pat血飛出嚟，幾有質感，唔使下下用茄汁呀嘛，搞到件衫污糟晒，阿媽洗得好辛苦㗎～

最緊要呢款血可以畀你塞返入去循環再用，等你重複重複又重複咁剖幾多次都得！你知啦，好多人一日都唔知激嬲女朋友同腦細幾多次，真係死十次都唔掂呀～而家你可以冇上限剖腹，就算要一日死多過羅樂林都完全冇難度呀！

封面圖片及資料來源：株式會社戰國.jp、curazy