啲人成日投訴結咗婚之後生活好悶，其實係睇你識唔識做㗎啫，做男人嘅得閒買下小禮物畀老婆，老婆心情好，自然你嘅日子就好過啲㗎喇。如果唔係，老婆就唯有自己準備實派時畀你，正所謂條路自己揀，到時你唔好「開心」到喊呀下～

好似美國呢個老婆咁，心地真係好好，喺屋入面見到出面有隻狗仔又凍又驚咁慘慘豬，就帶佢入屋同囝囝玩啦～循例都要問下老公可唔可以養佢嘅，個衰佬竟然話呢隻係狼喎！老婆梗係嬲豬啦，話晒對咗你隻男人老狗咁耐，係人係狗仲唔識分咩！

之但係，阿太，你呢隻好似真係狼嚟㗎啵。不過有時候狼同狗真係好難分嘅，香港都有隻狼，但係個名又叫乜乜狗啦……無論老公點同老婆解釋，老婆都堅持呢隻係狗。老公又係嘅⋯⋯應承咗人話聖誕養狗㗎嘛，都冇做返啲嘢，搞到老婆憶犬成狂喇。老婆仲要幫隻狼改埋名叫Spot呀，老公真的崩潰鳥，隻嘢全身邊忽有Spot呀？老公又唔使咁嬲豬嘅，你畀部router隻狼揹住，佢咪係流動「wife」spot 囉～

人總係要「尼龍嘥嘢」先知錯嘅，當老婆終於肯認衰咗，就係佢發覺隻狼啲反應唔多妥嘅時候，屋出面仲有狼嘅全家嚟萬里尋親?～老公唯有嗱嗱臨趕返屋企救駕喇。

呢個就係大台嘅標準劇情嘅時候喇！原來成件事都係老婆自編自導自演，係老婆P圖嚇老公啫～不過網友都問，其實都P得好明顯喎，老公咁都上當？是咁的，其實呢位老婆係有放4隻貂入屋嘅紀錄嘅⋯⋯但係老公又點會係因為咁先上當呢？肯肯定係因為太緊張老婆同個仔啫，55，一定係。

封面圖片及資料來源：Kayla Eby／Facebook