同鼠唔同命，同遮唔同柄。有啲老鼠可以收錢做嘢，有保安護身唔怕畀人趕走，仲好受大眾歡迎（毛毛冇講係鼠王芬，唔好屈9我）；但有啲老鼠就連搵食都要鬼鬼「鼠鼠」，一世只可以做隻名副其實嘅「過街老鼠」。老老77，搵食啫，犯法呀？好彩最近瑞典有個老鼠關注組見到佢哋咁可憐，就成功幫佢哋爭取到喺街度食嘢嘅自由啫！

呢個叫「Anonymouse」嘅神秘組織 ，見到老鼠權益被剝削，所以就靜靜雞搞咗個小革命，喺街頭轉角位開咗唔同嘅小食店，等啲老鼠都可以享有出街約fd子飯聚嘅自由，真係好偉大呀！吱吱！

雖然鋪仔細細，但係都五臟俱全㗎。除咗舖內會放啲食物喺度之外，室外嘅佈置都絕對唔求其！有細細份嘅Menu畀客仔揀有咩食，仲有埋畀老鼠睇嘅電影同演唱會海報?～

嗱，唔好以為呢啲鋪仔得個擺字呀，真係有客仔幫襯㗎！不過呢位人客好似摸門釘喎，叫咗你唔好咁遲嚟㗎啦。你知喇，芝士同花生供應一樣咁緊張，需求不斷上升㗎嘛！

不過各位鼠輩放心～ Anonymouse 喺佢哋嘅挨豬講明會喺嚟緊2017年開更多嘅分店㗎～到時就有更多鼠能夠受惠㗎喇～見到人哋咁爽皮，地方嘅吱吱係咪好想移民過去呢？

封面圖片及資料來源：Boredpanda