湊仔，堪稱世上最難打嘅工。全天候廿四小時on call呢啲不在話下，最慘係只要你睇漏你「腦細」一眼，佢就會隨時唔知發生咩事呀嘛！所以話呢，做阿媽嘅真係心血少啲都唔得掂！嗱，好似呢位日本媽媽咁，佢一個唔留神，阿仔就成個人坐咗入個馬桶度喇！

BB呀BB，你做咩咁睇唔開呀？就算瀨咗臭臭都唔使成個人浸落去個馬桶度沖涼㗎！雖然馬桶都有暖水噴出嚟，但係嗰度唔係浴缸呀！好彩爸爸同媽咪有沖廁嘅習慣啫……

其實呀，呢個BB都係想做個乾乾淨淨嘅乖寶寶啫，自己污糟咪自己洗囉～你哋睇佢連阿媽喺浴缸洗衫都想幫手就知佢乖啦！阿仔細個就咁乖幫手做家務，睇嚟大個一定會係個暖男嚟啫～

btw，講到最難服侍嘅「腦細」，應該都非呢個用炸豬扒汁嚟做spa嘅BB女莫屬喇掛？

any肥，無論啲BB幾百厭都好，對父母嚟講，最緊要都係佢哋平平安安咁快高長大啫！就算佢哋真係反轉晒成間屋又點吖？最多咪影低佢哋放上網呃like，然後條氣gur返咪繼續照顧佢哋囉～

封面圖片及資料來源：sayakaman／twitter、alice_a0202／twitter