相見好就同住難，就算係最親密嘅人總係會有啲嘢係特別難頂嘅⋯⋯例如另一半打鼻鼾好似拆天咁，細佬妹啱啱出世就搶晒Fo，阿媽係地獄廚神，Balibalabilibala......真係問題天天都多呀！作為一個成功嘅傢俬公司，梗係要「用心聆聽，更知你心」，咁啲產品先多人買㗎嘛～

好似Ikea 咁，為咗要融入家中，特登上網Google最多人有嘅煩惱，仲改晒啲產品名做嗰啲問題，等啲客對症下藥，有咩問題就買咩咁話喎。好似呢張床，老公扯鼻鼾咪踢佢去日間床度瞓囉！

兄弟姊妹嘅問題就更易搞啦，細佬妹搶你Fo，你咪買返個Spotlight日日射住自己，「高溫燒滾了我」咁嘅款，包你成為全屋焦點呀！

如果嫌兄弟關係太疏，冇咩connection，咪買返條線駁住佢個電掣囉，係咪即刻覺得瞬間被接通呢～

Yo，阿媽唔識煮飯咋嘛～使乜驚呀？正所謂，叮叮好方便，仲有粥又有麵，買部微波爐就咩都搞得掂啦！

最難得Ikea冇忘記過一班失戀嘅人，一樣咁體貼佢哋嘅需要。真係一疊紙巾都有佢嘅用處呀，失戀嘅嘢開咗部電腦，用晒成疊紙巾咪冇事囉，毛毛係話開電腦Del晒啲相，跟住喊晒成疊紙巾呀！唔夠喊仲可以趁特價買多幾疊?～如果之後想箍煲，買卷絲帶返去就得㗎喇，用嚟綁咩？我唔想搞大件事呀，你走啦。

不過點解佢淨係有 「How to Keep a Girlfriend」 冇 「How to Get a Girlfriend」㗎？分明歧視連失戀都無得失嘅單身狗啫！而家最多人嘅問題係連Girlfriend都冇呀，嗚⋯⋯Ikea 大神，有冇咩產品可以幫毒L唔使過Lonely Christmas呀⋯⋯？

封面圖片及資料來源：ikea retail therapy