小智，堪稱世上最強人類。有網民分析過，小智可以徒手拎起72kg嘅精靈，跳高距離近乎2米半，頸椎可以承受比卡超6kg嘅重量，而且個頭仲可以頂住近50kg嘅怪河馬?！你以為咁已經夠犀利？未算……

有網友表示，小智最高紀錄係舉起超過600kg重嘅樹幹呀！！！

雖然小智已經勁到可以稱為人間凶器，但估唔到咁強勁嘅小智竟然都有對手，而且仲要係一對外表斯文嘅母女？最近有網民玩緊新版Pokemon嘅時候就發現咗件可怕嘅事⋯⋯

呢個望落嬌滴滴嘅少女訓練員莉莉艾，個袋裝住嘅笨唔係普通嘅精靈，而係重達999.9kg嘅科斯莫姆呀！嘩，999.9kg咁咪即係差唔多成噸重？唔係下化，雖然好多女人個袋平日都好似裝磚頭咁，但都唔會孭住一噸周圍行仲面不改容咁恐怖啩！

更恐怖嘅係⋯⋯佢老母，毛毛講緊莉莉艾阿媽呀！佢竟然可以單手拎起一噸重嘅小精靈，仲要未計個籠本身嘅重量?！所以話千祈唔好得罪女人，如果佢哋畀個袋你拎，而你又拎得起，你好感恩喇！因為你永遠都唔知佢哋個袋裝乜，同埋佢哋究竟埋藏住啲咩實力⋯⋯

封面圖片及資料來源：Anna_botbot／twitter

圖片來源：Ettoday