那些年，戀愛育成game係唔少少男少女FF嘅開始。喺遊戲當中，你做嘅每一個決定都會影響之後嘅劇情，到底最後有冇happy ending？咁就要睇你識唔識玩喇。

早前，日本niconico搞咗個活動，參加者可以將自己整嘅RPG（角色扮演遊戲）投搞同網友開心些牙，假如個RPG受歡迎嘅仲會有獎勵！而最近，喺最受歡迎排行榜上竟然出現咗個非典型重口味戀愛育成game，呢個game嘅設定係要你同棵松樹談戀愛？嘩！唔係咁刺激下話？

個故仔係咁嘅：

話說你係一個每日都會對住松樹A（下稱A）傾心事嘅賣菜小女孩，然後有日老母同你講要搬屋，所以你就離開咗A。搬到新屋，你種過第二棵松樹B（下稱B）。而就喺你悉心照顧緊B嘅時候，B竟然用意大利文同你say hi（唔好問點解係意大利文，毛毛唔L知），於是你哋嘅愛情故事就開始咗……

嗱，跟住先到到戲肉。登登登櫈，大台三角戀情節出現了！A追你追到嚟新屋，仲要畀佢見到你棵新歡B，咁佢就梗係嬲到迫9你做決定啦……你揀吖！你要佢定要我？你講呀！

嗯，有冇人話畀毛毛知我究竟睇咗啲咩？

any肥，話明戀愛育成game，咁就梗係要培養下感情嘅。對住兩棵松樹，你除咗可以遠觀仲可以褻玩（i mean摸下棵樹），摸完之後佢哋仲會送禮物畀你?～而禮物係……一粒松茸？

呢粒松茸嘅形狀相當有可疑，毛毛極有理由相信佢唔係要嚟食……

btw，最重口味嘅相信都係呢一幕－老樹盤……呀唔係，係老樹壁咚先啱！

介紹返，其實呢個game已經出到第二章㗎喇，睇佢個勢，應該仲陸續有嚟?！如果你都想體驗下另類戀愛，不妨玩下吖～不過玩完唔使講返畀毛毛知有咩感想，55。

封面圖片及資料來源：遊戲《チクッ♥松に恋する受粉前》【第一章】