對小朋友嚟講，有得落公園搵fd子玩就最開心㗎嘞～不過，並唔係每一位小朋友都咁幸福，有啲小朋友唔好話落公園，就連聖誕節都要喺病房渡過……毛毛講緊咪一班患上重病、需要留院嘅小朋友囉。好彩，呢個時候出現咗一位想幫佢哋過一個奇幻聖誕嘅攝影師！

睇下，呢位攝影師竟然帶埋聖誕老人去醫院探佢哋，同佢哋影相呀！雖然就咁睇呢張相的確好普通、冇咩特別，之不過PS最犀利嘅地方係無中生有呀嘛，經過攝影師嘅後期加工，一個超爆夢幻嘅相咪出咗嚟囉～

估唔到一幅喺醫院影嘅相都可以變到好似童話故事嘅插圖咁靚！

而最緊要嘅係，呢輯相完成咗呢班重病小朋友嘅心願。就好似呢個小朋友咁，佢最希望嘅就係離開醫院，就算…就算係key出嚟嘅都好……所以呢位攝影師就將佢P咗去一間小屋入面，同媽咪、聖誕老人一齊開心過聖誕。

btw，要影到成功嘅相梗係要有偉大嘅幫手啦！唔係有呢位阿太願意跪低扮鹿仔，又點影到妹妹同聖誕老人餵鹿仔餵得咁開心呀～

雖然呢班小朋友都係要喺醫院過聖誕，但至少，呢輯相畀咗佢哋一個想像空間同安慰吖。香港嘅Daddy媽咪，你哋今年又準備點樣同仔仔女女過返個Merry Christmas呢？嗯，希望唔係補充練習無間做啦。

封面圖片及資料來源：StoryArt