2016年12月16日 星期五
【姊妹毛】用NuBra嚟上粉底都得？
開講都有話「工欲善其事，必先利其器」，所以要化一個靚嘅妝，又點可以冇一件好嘅工具呢～講到好嘅化妝工具，早前外國都推出咗一款矽膠粉撲，而且一推出就幾乎賣斷市咁滯?！btw，假如搶唔到矽膠粉撲可以點？哦，用NuBra咪得囉。
最近，有位外國化妝KOL見個矽膠粉撲hit到咁，於是就嘗試用同呢個矽膠粉撲差唔多質地嘅NuBra嚟上粉底，睇下效果會唔會一樣咁好喎！ 不過咁，對NuBra咁大個，要攞嚟當粉撲咁用就梗係要剪一剪先用㗎啦，剪到啱手形就可以開始上妝嘞。
呢位KOL一開始就用塊NuBra將啲粉底液推勻成塊面，跟住再用啪啪啪嘅方式，令啲粉底更貼服。唔使好耐，只係用咗三兩下手勢，話咁快就已經上好晒成個粉底～真係估唔到原來用NuBra上粉底都得喎！
呢位KOL仲話，雖然用NuBra嚟上粉底睇落真係有啲kai，不過當你唔見咗化妝掃嘅時候，咪可以用NuBra嚟救急囉。
話時話，真係多得呢位KOL發掘到NuBra嘅第二個用途，咁以後啲妹豬唔小心跌咗個NuBra落地咪可以有多個解釋，唔使咁尷尬囉！「哎吔！跌咗個粉撲?～得我執返先～」
