日本嘅廁所真係世界級！暖笠笠嘅廁所板、前後噴水嘅小花灑、仲有避免你尷尬嘅流水聲……每一樣都係貼心為你嘅設計。吖～毛毛以為照顧晒你身體嘅需要已經夠細心啦，點知而家連身體嘅延伸部分（即係你部手機）都照顧埋喎！

你就話日日沖涼啫（應該係），之但係唔係個個都日日抹電話㗎嘛，咁部電話咪好dirty？難怪啲人話電話仲污糟過廁板啦！不過唔使驚，由而家去到出年3月中，日本成田機場嘅廁所會有抹mon紙提供，而且用法仲超簡單?！

咪就係同用廁紙嘅方法一樣囉。拎夠要用嘅長度就摵落嚟，抹完mon就掉落廁所沖咗佢～Wow，乾淨晒！

嗱，而家知道呢張係咩嚟，到時去到就唔好用錯嚟抹patpat喇！

不過日本人做嘢又點會咁簡單，嗰張並唔係一張抺mon紙咁簡單，佢上面仲有埋日本連接Wifi嘅方法同埋翻譯app推介㗎！眼利嘅話你應該見到大大隻Docomo嘅紙喺上面，就知段片其實係宣傳緊Docomo啦～

但係呢段宣傳片本身個名係「How to Use Toilets」，全段片其實係由頭教你喺日本點揀同點用廁所先啱。究竟咩人要從頭認識日本廁所呢？

封面圖片及資料來源： Docomo Official／Youtube