寵物小精靈入面隻九尾有九條尾巴，又神秘又優雅，如果真係見到就好喇！最近美國竟然真係出現咗隻九尾，不過就唔係九尾狐而係九尾貓啵！

嘩，呢隻九尾貓啲尾點止九條呀，直頭有成十幾條呀，成日以為日本先有九尾，估唔到喺美國又會出現啵。不過細心啲睇下，隻貓個樣好似好辛苦，畀啲尾壓到唞唔到氣咁嘅？

原來貓貓有皮毛糾纏嘅問題，而主人又過咗身，冇人照顧佢，所以啲毛毛繞到好似一條條尾咁喇。貓有九條命就話好啫，有成九條尾咁多，一定覺得好大負擔喇……

好彩有好心人送佢去動物救援組織接受治療，貓貓而家變返健康嘅一尾貓，仲會由過身主人嘅親戚收養?。動物救援組織提醒大家，唔止要關心身邊嘅老人家，仲要留意下佢哋嘅寵物會唔會被疏忽呀。九尾係就係好靚，不過都係二次元世界見到會安心啲。

封面圖片、資料來源連結：Animal Rescue League Shelter & Wildlife Center