生日梗係要食蛋糕啦～以前啲蛋糕都係喺個面度畫公仔，而家就興3D 蛋糕，個蛋糕就係公仔嘅本體喇！好唔好食就固然重要啦，但係見到個樣咁靚，壽星見到一定仲開心啫～

好似呢個獨角獸蛋糕，真係好夢幻呀～獨角獸嘅精粹係咩，係隻角呀！雖然彩虹色便便都好重要，但係獨角獸冇咗隻角就唔係獨角獸，就好似魚柳包冇咗塊魚柳咁！外國有個媽媽知道自己囡囡鍾意呢個蛋糕所以就去買啦，點知跟住就出事喇……

就咁睇都冇咩啫，啲眼耳口鼻都冇乜特別喎，隻獨角獸仲笑得幾開心，唔見牙又唔見眼咁呀～啲忌廉便便，呀唔係，花花雖然同sample唔同顏色，不過colourful啲都幾靚吖？

睇埋隻角⋯⋯話明隻角係獨角獸嘅神髓，點解隻角唔止唔尖，仲要有種咁熟悉嘅感覺㗎！唔通個餅師唔小心拎咗自己啲私伙出嚟？阿媽又唔好咁唔開心，話唔定呢個蛋糕好似出奇蛋咁，可以一次過滿足你三個願望，有得食，有得影相呃like，仲有得玩～點玩？拎去練下刀功囉～

越睇隻角就越熟口面⋯⋯毛毛終於認得啦！係聖誕老公公朱古力呀！餅師一定係見聖誕節，所以用咗最時令嘅材料去整呢個蛋糕啦～55，一定係。

封面圖片及資料來源：stefnic/Reddit、yennyhanjaya／Instagram、ColTalbot1／twitter