聖誕節交換禮物簡直就係朋友之間嘅人格大考驗，一次就可以睇清你身邊人係點。你以為一定抽唔中自己嗰份，亂咁買就冇事咩，施主，你太年輕啦，唔通你唔知道呢個世界有啲嘢叫因果報應咩？就算只係諗下整蠱人都可能出事呀！

台灣呢個朋友仔真係好有創意呀，人哋叫佢買份200台幣內嘅禮物，佢竟然想去買個「雪糕筒」喎！仲要唔係食得個啲喎，係交通錐呀！不過佢「良心發現」，最後都買份實用嘢就算。唓～唔好話佢驚有報應會抽到唔知啲咩～

抽獎嗰陣佢見個個抽啲嘢咁正常，心諗好彩冇買到雪糕筒咋，如果唔係一定全部人都歧視佢啫～點知去到佢嗰份嗰陣，竟然係一梳十支廁所刷呀！最慘嘅係佢想嬲都冇得嬲呀，話晒自己本身想買雪糕筒仲衰仔啦，而家畀返十支刷你，個天都算係咁啦～拎返嚟同十個朋友交換禮物，分分鐘又換到一百支返嚟，真係諗下都發過發哥呀！

再靚嘅女神，都可能係靠P圖嘅，表面上再正常嘅禮物，都可能係一大個伏……呢套咁精美嘅Schedule Book，係咪睇見都想要呢？但係靚得嚟好似有啲唔妥咁喎。喂，下年明明係2017年，你送埋2015同2016 有咩用呀！送禮物嗰個話係「活在過去，存在現在，迎接未來」咁解喎⋯⋯真係多（拍手）謝你呀⋯⋯

封面圖片及資料來源： dcard