雖然這個冬天不太冷，但對於吃貨嚟講，咩季節都好，最緊要就係有得食！而呢個時間去日本鳥取縣食蟹就啱啱好喇～日本出名有創意我鍾意，連宣傳叫大家食蟹都寧舍不同呀～

估唔到去到機楊就已經有免費松葉蟹肉食喇，拎嘅方法仲要係扭開個水龍頭就有得食，真係既方便又快捷呀！不過水就話用個水管傳入去啫，究竟啲蟹肉又喺邊度嚟呢？

都話每一部成功嘅機背後都有一個辛勞嘅人㗎啦，呢個水龍頭嘅秘密原來就係呢位佐藤婆婆呀！啲蟹肉都係婆婆逐嚿塞入去個水龍頭度，只係想佢哋可以開開心心食到「餓醫師」 嘅蟹肉，真係太偉大喇！以後毛毛都會對提款機同自動售賣機入面嘅哥哥姐姐好啲㗎喇！

唔止有人肉水龍頭（a.k.a.人肉嘅蟹龍頭），估唔到鳥取嘅人愛蟹愛到要用蟹鉗嚟剪頭髮呀。呢把蟹鉗剪係呢個伯伯嘅秘密武器，唔係咁容易出鞘㗎，如果你同老伯一樣咁愛蟹，話唔定佢仲會幫你做個「打橫行全蟹套餐」，除咗剪髮仲有其他蟹類服務㗎！

既然蟹鉗可以用嚟剪頭髮，就當然可以用嚟剃鬚啦，剃完髮剪完頭仲可以用埋蟹味洗頭水同你洗個靚頭。做完成個套餐你肯肯定型到可以好似隻蟹咁橫行無忌呀！

最估唔到連早幾日hit 爆嘅超市賣蟹變魔術片，原來都係佢哋精心泡製嘅宣傳片嚟㗎！太可惡喇！竟然咁樣欺騙一眾網民嘅感情，真係唔食返十隻八隻松葉蟹報仇都對唔住自己呀。不過要報仇，首先，你要有錢。

封面圖片及資料來源：itmedia.co.jp、とっとり動画ちゃんねる／Youtube​