喺日本真係到處都係哥斯拉嘅蹤跡，之前又有稻草哥斯拉，又有人用lego嚟砌哥斯拉，搞到C9老是常出現呀！咁鮮明咁出眾嘅C9，其實都有想靜一靜嘅時候，但估唔到佢今次咁低調都仲畀人搵到呀！

睇下呢幅相，都冇咩特別呀，咪又係一棵棵綠色嘅樹，不過吹歪咗咁解咋嘛。不過有啲嘢凡人就睇唔到嘅，係要大師先睇到㗎。講緊嘅咪就係P圖大師囉！

經大師輕輕用畫筆作返個法，即刻見到佢個真身喇！哥斯拉，你以為扮樹就得喇咩？現形啦！咦？畀人發現咗嘅C9好似唔多高興喎，大師，古乳有暈，上天有好生之德，話晒都聖誕節，你就放過佢，唔好搞人啦。

話口未完，係咪呢，聖誕流流都唔畀人哋放下假，係都要搞住人，出事㗎嘛！搞到C9嬲到出雷射光啦！C9呀C9，你都唔好咁嬲喇，鬼叫你係打工仔咩，聖誕節冇假放，係咁㗎啦～好出奇呀？不過你都唔使咁唔開心嘅，呢個世界仲有大把人同你一樣聖誕都要OT㗎⋯⋯ 

封面圖片及資料來源：takuhikoy／twitter