我哋同父母之間嘅隔膜，隨住長大而一直加厚。

由細個乜都可以講一餐，到而家一日都講唔夠十句。

呢個情況，相信好多人都經歷過，而63歲嘅皮旦叔同囡囡Kishi都唔例外。

但曾經破裂嘅關係，竟然由一間模型舖修補。

【將FF變成真實】

皮旦叔細個嘅時候，模型對於佢嚟講係奢侈品，所以佢只好用雪條棍，將心目中嘅玩具砌出嚟。

「砌模型就係可以將想像變成真。」

成家立室後，皮旦叔仍然冇停過手！

由Kishi嘅玩具，到全屋嘅傢俬，皮旦叔都親力親為。

【忽發奇想】

2002年嘅時候，49歲嘅皮旦叔無意中睇到一個60歲成功創業嘅報導⋯⋯

「繼續打工生活都唔會有咩改變，不如闖下啦。」

叮一聲！呢個念頭，改變咗皮旦叔嘅一生。

「開模型舖係我最大嘅夢想，而家已經達成咗喇！」

但最值得開心嘅係，呢間模型舖令佢同Kishi嘅關係破冰。

【疏離嘅十年】

見到佢哋兩父女攬頭攬頸咁，一定會以為佢哋由細FD到大。

原來佢哋嘅關係，都經歷過一段冰河時期。

喺Kishi仲讀緊書嘅時候，皮旦叔會負責接送。

呢程車，係佢哋最好嘅溝通時間。

但自從Kishi搬咗出去住之後，就好少同皮旦叔傾偈。

「嗰時我唔會主動打畀爸爸，每次佢打畀我，都係好求其咁講一兩句就收線。」

「凍呀，著多件衫呀。」「知道。」「返工返成點呀？」「OK啦。」

喺呢十年嚟，佢哋不停咁重複同樣嘅對話。

【三年前嘅發現】

直至三年前，Kishi落舖頭搵皮旦叔，先發現原來爸爸有好多白頭髮，原來爸爸已經唔再後生。

「嗰時覺得要幫下爸爸手，唔可以要佢咁辛苦。」

就喺呢一刻，疏遠咗十年嘅關係終於拉返近。

【FD過打band】

細個砌開高達嘅Kishi，唔明咁「可愛」嘅模型有咩好玩，但落手做過之後，先明白當中嘅樂趣。

「開始知道爸爸每日係做緊啲咩。」

Kishi有正職在身，但一放假都去舖頭幫皮旦叔手。

「老花深咗……有時要處理啲好細件嘅配件，會有啲吃力，真係要阿女幫手。」

但再好嘅關係，都會有拗撬嘅一日！

「爸爸整模型著重放得耐、要穩陣，我就著重真實度，成日都因為咁樣鬧交！一嗌交佢就拎袋走人㗎喇！」

「哈哈係呀！唔夠佢拗呀！」

原來鬧交，都可以鬧得咁溫馨。

【一路開舖，一路退休】

皮旦叔除咗鍾意砌模型，仲好鍾意同客人傾偈。

但舊舖太細，放到模型都放唔到多個人，一年前Kishi就為爸爸開多間舖。

新舖周圍都係櫈，原來係等客人上嚟嗰時，可以坐低同皮旦叔慢慢傾偈。

「雖然賺唔到錢，但爸爸鍾意就得啦！」

皮旦店，除咗係皮旦叔嘅夢想，亦係兩父女嘅小天地。

人大咗，我哋變得含蓄，唔再坦率咁表達我哋嘅情感。

但其實只要踏出多一步，父母嘅大門無時無刻都為我哋而打開。

有興趣知道更多皮旦店嘅資料，可以去佢哋嘅FB睇下：
Petershop 皮旦店 - 模型小屋專賣店

店舖地址：
九龍 深水涉 桂林街38K 惠康大廈3樓E室
九龍 深水涉 欽州街37K 西九龍中心5樓 (蘋果商場一期) 5K60舖