開講都有話「君子報仇十年未晚；小人報仇一年到晚」，不過毛毛勢估唔到，除咗小人同方丈記仇之外，原來連狗狗都會咁記仇㗎喎！

話說，有位台灣網民屋企就養咗兩隻狗狗，分別係雪橇Hero同狼狗斑比。本來兩隻狗狗都相處得好好地嘅，點知早幾日Hero畀斑比兇一兇之後就懷恨在心，竟然趁大家唔為意嘅時候就喺斑比隻飯碗度小便呀！

嗱，根據Hero留低落嚟嘅證據，大部份尿都喺碗入面嘅，照咁睇佢仲唔係特登瞄準斑比隻飯碗嚟屙？原來Hero嘅真身係狗界方丈，毛毛真係失敬失敬喇……

而呢位主人事後就補充，其實Hero除咗因為想報仇之外，仲因為平時去開個廁所咁啱拎咗去洗，所以先揀自己巴打隻飯碗嚟屙嘅！佢仲話，只要Hero去錯地方小便，阿媽就會罰Hero坐喺灘尿面前5至10分鐘兼大聲話佢幾句，等佢記住下次唔好犯錯。

雖則今次Hero就去咗自己巴打隻飯碗度小便，不過既然斑比之前都兇過佢一次咯，大家咪當打個和算數囉～

資料來源：哈狼日記- Hero & 斑比