聽講乖嘅小朋友只要喺瞓之前掛隻聖誕襪喺床邊，咁到咗夜晚，聖誕老人就會偷偷地潛入佢屋企，再將禮物放喺隻聖誕襪入面……

嗱，呢個關於聖誕老人嘅傳說，應該都冇乜邊個未聽過㗎啦？雖然大家都知個聖誕老人多數係阿爸阿媽扮，之但係有禮物收唔通你唔收咩？係醒目嘅就梗係唔好踢爆阿爸阿媽，一於chok個天真樣出嚟扮信有聖誕老人啦。

而呢位醒目仔都唔例外，一樣好聽話咁喺瞓之前將隻聖誕襪掛喺床邊，果然到最後佢真係收到聖誕禮物呀！吖，唔知（阿爸阿媽扮嘅）聖誕老人今次送咗啲咩畀禮物佢？係最鍾意嘅零食，定係想要好耐嘅玩具呢？

原來，呢隻聖誕襪入面裝住嘅係一本練習試卷。

「天呀！到底我做錯咗啲咩呀！」大家睇下呢位小朋友嘅表情係幾絕望，簡直可以用「來回地獄又折返人間」嚟形容佢而家嘅心情……老老竇竇，喺呢個咁傷感嘅毛文，毛毛除咗唱返首《補充練習無間做》之外都唔知講咩好，希望呢位小朋友嘅家長只係開下玩笑，唔係真係諗住喺聖誕節送本練習試卷畀佢啦，55。

資料來源：張昏昏兒