古乳有暈，「相見好，同住難」 ，要搵到一個好roommate，既講人品更講運氣！好彩畀你遇到個好roommate，同你開心share啲家務，仲可以一齊毒住過聖誕同除夕，就真係冇得彈呀～不過如果畀你遇到呢位台灣網友做Roomate，就唔知你開心定無奈好喇。

是咁的，有位網友話次次去做運動都有個同房甩底喎。咁同房你就唔啱啦，話晒有啲運動起碼要兩個人先做得㗎嘛，例如打友誼……羽毛波呀。呢個同房誓神劈願話下次唔會甩底，再甩就瞓廁所咁話喎，嗱，講好記得找數呀，廁所都洗定等你喇！

唉，人類總是⋯⋯同房好明顯又甩底啦～作為佢嘅好同房，大家梗係要「禁室培育」呢個找數真漢子啦！不過個個都咁錫佢，又點捨得佢瞓個臭臭廁所呢？於是大家發揮互助互愛嘅合作精神，幫佢廁所大改造，又鋪墊又噴香水，等佢返嚟有個5星級的房呀！

仲要連搬嘢都唔使麻煩呢位同房，所有佢要用嘅嘢一應俱全，唔止幫佢裝好電腦同拖蘇，連檯燈同風扇仔都幫佢準備埋，kind of sweet! 

不過同房返到嚟竟然唔領情，仲有啲嬲嬲豬?～同房呀同房，你知唔知而家有埋私家廁所嘅套房幾難搵呀，入面仲有埋高科技感應式抽氣扇同燈，可以較時間長短同亮度，簡直係quality of life 呀～你問咁呢間房入面嘅其他人唔會冇廁所用咩？傻豬嚟嘅，梗係間房有兩個廁所先咁玩啦，所以呢，香港嘅朋友，這些機會冇你份㗎喇。

封面圖片及資料來源：dcard