好多人以為做地獄廚神好易，其實要好似佢哋咁做出咁有創意嘅暗黑料理都不知幾難呀！要同普通人用差唔多方法煮，但係就要做到非凡人做到嘅效果，睇都睇唔出個碟係咩，呢種境界先叫高呀！唔信你望下由日本網民整嘅呢餅嘢，睇唔睇得出係咩嚟？ 

一塊墨汁煎餅？咁易畀你估到就唔係地獄廚神啦！呢餅係一餅意粉，仲係一滴墨汁都冇嘅意粉呀。就咁講真係好似冇咩說服力嘅，一塊黑猛猛嘅嘢，點睇都唔似意粉喎⋯⋯你表面睇佢好似只係一塊黑色嘅餅，但只要你將佢反轉就見到佢真面目㗎喇！

喺一片漆黑中，你仲隱隱約約見到個幾條縱橫交錯嘅乾煎意粉，就好似一個黑頭髮底，但頭頂有一撮金毛嘅MK仔咁鮮明同咁出眾。點解好地地一個意粉會搞到咁有藝術感？咪就係有人整意粉唔睇火囉。

不過佢都算好彩㗎喇，淨係個意粉燶咗，好似呢位網友咁，諗住叮返熱嗰啲薯仔食下啫，點知個薯仔竟然爆炸呀！仲搞到要搵消防叔叔求救，人哋消防叔叔見你搞成咁都唔知笑唔笑9你好呀。

所以你哋記得要愛錫身邊嘅地獄廚神呀，因為佢哋經歷過無數嘅險境先可以生存到今時今日㗎！不過，如果佢哋煮嘢係打算煮畀你食的話，咁除咗希望佢最後武士之餘，都祝你好運喇⋯⋯

封面圖片及資料來源：teicln／twitter、aoneko0426／twitter