對於好多嘅男人嚟講，收藏模型玩具呢條路好難行，因為身邊嘅人好多都唔明白究竟呢啲玩具對佢哋嘅意義幾大！呢啲玩具就係男人嘅浪漫同命根，叫佢哋掉咗或者賣咗啲收藏，簡直同攞佢哋條命冇分別呀！唔信，你睇下呢位仁兄就知啦！

噚日東日本發生咗場6.3級嘅地震。呢位勇士喺生死一線嘅毛文，腦入面嘅第一個念頭唔係打畀阿珍，或者同阿媽講句我愛你，而係衝過去㩒住嗰個放晒佢啲收藏嘅寶貝變身腰帶嘅木架，唔畀個架冧落嚟呀！置生死於度外都要保護啲變身腰帶，呢啲咪真愛囉！

不過屋企嘅小朋友千祈唔好學呀，咁危險，隨時出事㗎嘛。好心佢啦，守護自己啲寶貝之餘都要注意自己嘅安全㗎嘛～起碼都即刻變身先啦！即刻擸條腰帶變做幪面超人咪可以保護自己免受傷害囉！

對於收藏家，收藏就緊要過條命。咁其他人又點呢？Well，對於食貨，比生命更重要咪係自己嘅晚餐囉～呢位可憐嘅食貨就係地震嗰陣，眼白白望住就嚟有得食嘅壽司跌晒落地，佢個心真係同啲壽司一樣碎了一地呀！Any肥，地震嗰陣都係保住命仔要緊，話晒生存係為了買更多嘅玩具同埋食更多嘅美食呀嘛～

封面圖片及資料來源：zinnki／twitter、marisci123／twitter