老媽子成日話食雞腳乜乜乜同飲豬腦湯乜乜乜會以形補形喎，所以幾唔鍾意都食少少啦。但毛毛由細到大都諗唔明，啲人成日話豬咁蠢，咁點解會飲豬腦湯嚟補腦呢？唔知係咪有人都有呢個諗法，所以公然將出名高智慧嘅日本明星開腦拎去當甜品賣呀！

講緊咪係陪伴我哋成長嘅叮噹囉！咪住先，叮噹明明係機械人，個腦嗰啲都應該係零件嚟㗎喎，唔通真係要食螺絲？

其實佢只係同其他坊間嘅餅鋪一樣，用卡通人物杯嚟載住啲甜品，咁咪多啲fans會買之餘仲可以賣貴啲囉！只不過佢啲甜品個面又紅色，又拱起少少，又啫喱狀⋯⋯望落真係好似做完開腦手術咁嘅款呀。唔通店主特登整到啲士多啤梨成個腦咁，想sell 食完之後會好似叮噹一樣咁高智能？

放啲嘢入去個頭型容器扮係個腦呢招好熟口面喎，我知啦！係哥哥套《金玉滿堂》呀！人哋個猴子腦都係用豆腐整咋嘛～用士多啤梨同啫喱整叮噹個腦咪仲好食～不過個賣相就好似啱萬聖節多過聖誕咁啫⋯⋯

封面圖片及資料來源：1010daro／twitter