去動漫節最緊要係咩？睇女女？毛毛係啲咁嘅人咩！不過的確睇啲專業嘅cosplayer 扮各種各樣角色係幾開心嘅～呢幾日係日本C91漫畫展，所以大家都各出奇謀，除咗cosplay動漫角色，仲cos咗好多你估佢唔到嘅嘢呀！

首先介紹啲正路啲嘅先啦～話晒宮崎駿嘅動畫咁經典，又點會冇人cos呢？不過最搶眼嘅竟然唔係靚仔靚女嘅男女主角，係《天空之城》嘅配角達美先生同佢老婆，仲有畀人捉住咗嘅媽打同佢嘅海盜團呀！仲有《飛天紅豬俠》嘅阿Lam呀，睇佢個衰鬼瞓得仲要幾歎～

不過日本Cosplay界嘅創意又點止咁簡單？居然有人cosplay《龍珠》入面嘅悟空⋯⋯嘅龜波氣功啲氣呀！呢啲咪名副其實「瞓身」演出囉！

Cosplay呢家嘢最緊要夠貼地，貼地笨唔一定要瞓埋落地嘅，從日常生活都可以搵靈感都得㗎喇！好似呢個朋友，cos嗰樣嘢如果你識用，你都有返咁上下年紀喇，係一個穿針器呀，55，呢樣嘢毛毛見過都唔識用呀！

介紹返，如果想賣廣告，不妨好似呢兩位仁兄咁，cosplay返個牌子，喺會場向左走向右走，呢種「硬入式」嘅銷售，肯肯定連腦細見到都忍唔住要加你100蚊人工呀！

你以為cosplay只係人類嘅專利？人類，你太年輕了！機械人Pepper同佢啲姊妹柴米油鹽一齊出道cosplay 《Love Live！》呀，仲又唱又跳?！不過望一望佢個樣。cosplay嘅嘢都係交返畀人類罷啦⋯⋯⋯你哋走啦，我唔想搞大件事呀。

封面圖片及資料來源：WANIGUNNSO／twitter、ranakino／twitter、morimoriqp／twitter、Rchanneru_0302／twitter、A_Syosui／twitter、dt_pal／twitter、hanilyu1341／twitter