雖然衫嘅都係買新嘅好，但新嘅貴呀嘛～間唔中買下二手衫都幾好㗎，又夠環保。去日本古著店仲正呀，啲衫又企理又有style，簡直就係窮L平靚正之選！不過竟然有一間鋪頭竟然用雙倍價錢，賣啲畀人著咗成年嘅牛仔褲畀啲客，原物主仲要唔係明星或者少女，係一班雄糾糾嘅大叔呀！

咁重口味？唔同大叔著過嘅牛仔褲有啲咩特別功效，著均成世計會好似鉛水咁延年益壽？錯錯錯！原來呢批牛仔褲係「有故事的牛仔褲」，所以先賣咁貴呀。

呢個計劃，係想令每一條牛仔褲都有佢特別嘅故事，所以就邀請咗唔同界別嘅人去著呢啲牛仔褲一年，令到啲褲有返嗰嗰職業嘅特色。例如畀漁夫著完，咁嗰條褲就算洗過都會有海水嘅味道同捕魚嗰陣造成嘅損耗。而畀獵人著過一年呢，就洗完都可能仲有啲動物嘅血跡留低。

不過放心，每個參與者有兩條牛仔褲，唔止有得換，個個星期都會拎返去間鋪度用特別嘅方法清洗，所以一啲都唔Dirty㗎。所以話，舊嘢未必唔好嘅，同一樣嘅嘢多咗個故事，多咗種味道，個價值就唔同晒㗎啦～呢啲咪麻甩的浪漫囉！

封面圖片及資料來源：OddityCentral、OnomichiDenimProject／Facebook