吖，毛毛以為淨係黃大仙先有求必應啦，點知原來連普通一個負責送外賣嘅店員都一樣有求必應㗎喎！話說，早兩日喺北愛爾蘭有位女女一個人喺屋企病到死下死下，真係連落街買盒感冒藥食下都冇力呀陰功，於是佢就諗到一個方法，就係叫外賣！

佢喺炸魚薯條店Feeley's Fish and Chip Shop落咗個order，而備註嗰欄就寫：「送餐嘅時候可唔可以順便幫手買盒感冒藥呀？我會畀返錢你。其實我叫外賣都係想要盒感冒藥，我真係病到死下死下咁呀！（以上對話由毛毛9譯）」，希望店員可以幫手買感冒藥畀佢。

而呢間炸魚薯條店收到order之後，竟然真係幫呢位女女買感冒藥？嗚哇，係愛呀哈利！

佢哋仲話，淨係佢哋先有呢啲咁貼心嘅服務㗎咋，希望呢位顧客可以快啲好返啦！搞到呢位女女嘅老竇阿John都忍唔住喺炸魚薯條店嘅facebook page留言，話好感激佢哋嘅幫忙同好欣賞佢哋。

btw，今時今日做外賣仔竟然連感冒藥都要買埋，真係唔簡單……

資料來源：Feeleys Chippy

回帶：【不要玩店員！】連叫個外賣都有求必應

回帶又回帶：【最有愛網購】失戀取消情侶裝訂單 老闆照送安慰卡