2017年01月03日 星期二
【強烈呼籲】唔想再見到牛牛食膠袋 就記得帶返啲垃圾落山！
元旦呢幾日假期，真係好迫人好熱鬧呀！不過毛毛唔係講緊旺角，而係郊野營地呀～三日假期搭飛機去旅行又唔夠時間，但匿喺屋企又好浪費光陰咁，孭起背囊去行下山、扎下營，親親大自然咁就perfect喇！
雖然「自己垃圾自己帶走」呢句說話都講過好多次啦，不過有網民竟然都喺馬鞍山昂平營地見到呢個咁令人心痛嘅畫面……話說呢隻牛牛對草地上面一個膠袋好有興趣，就開始當草咁食喇，點知咬極都咬唔開，佢竟然決定一嘢成個生吞落肚！
隔咗一陣，牛牛又將原個膠袋吐返出嚟，膠袋入面原來裝滿食物包裝、抺過生肉的廚房紙，同埋一隻好新淨嘅硬膠飯殼，牛牛就揀咗啲廚房紙嚟食喇……食膠袋又點可以當食生菜呢，但有手尾少少，帶返啲垃圾落山，就真係易過食生菜喇，希望大家下次去親親大自然嘅時候，都唔好淨係將垃圾掉入垃圾桶，而係成袋帶返出市區掉啦！
封面圖片、資料來源連結： Candy Yau／再見垃圾桶！
延伸閱讀：
