其實養毛孩真係要好有耐性同好小心㗎，特別狗狗唔係咩都食得，但佢哋有時又好為食，真係冇佢哋收呀！朱古力呢啲雖然好味，但係唔畀得佢哋食嘅嘢就當然要擺好啦～原來啲平日冇人會諗住食嘅嘢都要收埋呀！

是咁的，呢個主人放咗工就好開心諗住返去同狗狗Happy Together啦，點知一返去就見到佢個狗頭腫到成個豬頭咁，真係嚇到主人心都離一離呀！

睇下佢個咀，腫到一孖潤腸咁，連眼仔都擘唔大，主人以為佢畀嘢咬，就諗住睇下隻兇手喺唔喺附近，可以帶埋去獸醫度方便醫生開藥啦，點知就搵到真正嘅兇手……吖唔係，係受害者至啱喇！

謎底已經全部解開喇！原來唔係人哋叮佢，係狗狗為食走去一啖咬落個仙人掌度呀！狗狗，你食厭咗肉想食菜咪出聲囉，唔使咁睇唔開㗎。雖然嚿仙人掌望落係好Juicy，但係咁多刺，點解你都咬得落嘅？

真係陰功豬喇，唔止係話隻狗狗，連棵仙人掌都係呀！主人都知狗狗你痛，不過你唔怪得人哋用啲刺襲擊你㗎，你咁大啖噬落去，人哋都係用身體嘅延伸部分自衛啫。唉～狗狗為食成咁，主人你都係改去種菜罷啦～

封面圖片及資料來源：可愛寵物中心／微博